Veffundur 26. nóvember: Wise og Defend Iceland
Veffundur Wise og Defend Iceland
Hvar liggja mörkin?
Hvenær dugar vöktun ekki lengur og hvenær þarf að grípa til raunverulegra varna? Og hvaða áhættu er fyrirtækið tilbúið að taka? Á veffundi Wise og Defend Iceland skoðum við hvar mörkin liggja milli þess að fylgjast með áhættu, verjast henni og ákveða að lifa með henni.
Þrjú erindi
Á dagskrá
Vöktun er ekki það sama og vörn
Hjörtur Pálmi Pálsson, netöryggis- og samfélagsstjóri Defend Iceland
Mörg fyrirtæki gera samning um SOC-þjónustu og telja sig þar með vera varin. Á sama tíma fer stór hluti kjarnastarfsemi þeirra fram í vefkerfum og SaaS-þjónustum sem eru opin öllum á internetinu. Flesta veikleika sem tilkynntir eru til Defend Iceland, einnig þá alvarlegustu, er hægt að misnota án þess að vöktun gefi viðvörun.
Í erindinu er farið yfir hvers er raunhæft að vænta af SOC-þjónustu, hvaða áhætta stendur eftir og hvernig hægt er að finna hana áður en árásaraðilar gera það.
Hvar liggur jafnvægið? Fjárfestingar og áhætta í upplýsingatækni
Áki Hermann Barkarson, framkvæmdastjóri Rekstrarlausna hjá Wise
Áki Hermann deilir reynslu sinni af því hvernig stjórnendur geta fundið jafnvægið milli fjárfestinga og áhættu í upplýsingatækni. Hann tekur fyrir spurningar sem margir stjórnendur þekkja: Er ég að fjárfesta í réttu hlutunum? Hvenær breytist eðlileg aðhaldskrafa í upplýsingatækni í rekstraráhættu sem ekki er ásættanleg?
Markmiðið er ekki að eyða sem mestu í tækni heldur að átta sig á því hvar mörkin liggja og hverju fyrirtæki mega ekki fórna.
Erindrekar netárása
Theódór Ragnar Gíslason, framkvæmdastjóri og stofnandi Defend Iceland
Við stöndum frammi fyrir nýrri tegund netógna. Gervigreindar-erindrekar (e. AI agents) með meinfýsinn tilgang geta í auknum mæli leitað sjálfstætt að áður óþekktum veikleikum, fundið leiðir inn í tölvukerfi og framkvæmt flóknar netárásir með mun minni aðkomu manna en áður. Þetta er að auka bæði hraða og umfang árása til muna: verkefni sem áður tóku árásarmenn vikur eða mánuði geta í auknum mæli verið sjálfvirknivædd og framkvæmd á klukkustundum eða dögum.
Í þessu erindi skoðum við hvað er að gerast núna, hvaða getu illviljaðir gervigreindar-erindrekar hafa í raun og hvaða áhættu þeir geta skapað fyrir íslenskan hugbúnað og íslensk netkerfi. Við rýnum jafnframt í hvernig þessi þróun mun breyta landslagi netöryggis og hvers vegna fyrirtæki, stjórnvöld og almenningur þurfa að endurhugsa varnir sínar gagnvart þessari nýju tegund netógna.
Tengjumst
Við skoðum þetta saman